لە چین، ئیتر مەرج نیە بۆ دکتۆرا نامەیەکی ئەستووری پڕ لە مەرەکەب بنووسیت کە لەسەر ڕەفەی کتێبخانەکان تۆزی لێ بنیشێت! دەتوانیت بە دروستکردنی داهێنانێکی ڕاستەقینە بڕوانامەکەت وەربگریت 🇨🇳🛠️

بیرۆکەکە شێتانە بەڵام پڕ بە پێستە: لەبری ئەوەی چەندین مانگ سەرقاڵی ڕیزکردنی وشە و تیۆری بیت، شتێک لەسەر زەوی دروست بکە کە کێشەیەکی ڕاستەقینە چارەسەر بکات 🤯. ئەمە خەیاڵ نیە، بەڵکو ئێستا لە چین بووەتە یاسا لە بەشەکانی "ئەندازیاری پیشەیی": لە زانکۆی باشووری ڕۆژهەڵات (Southeast University)، توێژەرێک بە ناوی "چینگ خەهوی" دکتۆراکەی وەرگرت تەنها لەبەر ئەوەی تەکنیکێکی نوێی داهێنا بۆ دروستکردنی پایەی پردەکان بە شێوازی پارچەی ئامادەکراوی وەک یاری "لێگۆ" 🧱.

گرنگیەکە لە کوێدایە؟ ئەم داهێنانە لە تاقیگە نەمایەوە، بەڵکو ڕاستەوخۆ لەسەر پردی زەبەلاحی "چانگتای" لەسەر ڕووباری یانگتسی خرایە بواری جێبەجێکردنەوە! هەروەها لە پەیمانگای هاربین بۆ تەکنەلۆژیا، دکتۆرا دراوە بە توێژەرانێک کە ئامێری پێشکەوتووی لەحیمکردنیان بە لەیزەر لە بۆشاییدا (Vacuum) بەرهەمهێناوە ⚡.

📌 بەڵام با تێگەیشتنەکە تەواو بێت: چین نامەی دکتۆرای نەسڕیوەتەوە، بەڵکو دەرگایەکی نوێی کردووەتەوە. خوێندکار ناتوانێت هەر ئامێرێکی هەڕەمەکی دروست بکات و بڵێت دکتۆرام دەوێت! دەبێت داهێنانەکە تاقیکردنەوەی ئەندازیاری توند تێپەڕێنێت، بە بەڵگەوە پێشکەشی لیژنەی پسپۆڕان بکرێت و بە تەواوی ئیش بکات. تا سەرەتای ساڵی ٢٠٢٥، زیاتر لە ٦٠ خوێندکاری ئەندازیاری لە سەرتاسەری چین بەم شێوازە کردارەکیە بڕوانامەیان بەدەستهێناوە 🎓.

💡 پەیامی سەرەکی و پرسیارە گەورەکە لێرەدایە: لە سەردەمی ژیری دەستکرددا، کاتێک AI دەتوانێت لە چەند خولەکێکدا باشترین توێژینەوە و کۆد بنووسێت، تەنها توانای "نووسین" بەس نیە بۆ ئەوەی بسەلمێنیت زانای. پرسیارەکە لەمەودوا دەبێتە: تۆ چی دەتوانیت لەسەر زەوی بنیات بنێیت نەک چەندت پێ دەنووسرێت؟ 🤖🏗️

ئەگەر لە زانکۆکانی ئێمەش بڕیارێکی وا بدرایە: پێت باشە داهێنانێکی کرداری جێگەی ئەو هەموو نامە ئەکادیمیە بگرێتەوە کە لە دوای دەرچوون کەس نایانخوێنێتەوە؟

Ahmad Birdoz