ڕامین سەید، گەنجێکی تەمەن بیست ساڵانە کە شاهیدی ناڵاندنی باپیری بوو بەدەست ئامێرێکی بیستنەوە کە بە 4700 دۆلار کڕابوو... بۆیە بڕیاریدا جێگرەوەیەک بە تەنها 20 دۆلار دابهێنێت..

ڕامین سەید باپیری دەبینی کە زیاتر لە ساڵ و نیوێک بوو خەریکی کڕینی ئامێرێکی بیستنی پزیشکی بوو، کاتێکیش لە کۆتاییدا ئامێرە پزیشکیەکەی بەدەست گەیشت، بە تەواوی لێی بێزار بوو؛ چونکە پڕ بوو لە ژاوەژاو و دەنگی ناخۆش، سەرەڕای نرخە گرانبەکەی کە 4700 دۆلار بوو.

لەبری ئەوەی کڕینی ئامێری بیستنی گرانبەها وەک واقیعێک قبووڵ بکات، لەگەڵ دوو هاوڕێی بە ناوەکانی ئاریش شەهاب و ئارۆن یو لە زانکۆی ماکماستەر، بڕیاریاندا ئامێری بیستنی پزیشکی لە خاڵی سفرەوە سەرلەنوێ دابهێننەوە.

ڕامین و هاوڕێکانی پرسیارێکیان وورووژاند کە پێشتر کەس لەم بوارەدا نەیپرسیبوو: چی دەبێت ئەگەر ئامێرەکانی بیستن پێویستیان بە چیپی ئەلیکترۆنی، پاتری، یان نرخێکی خەیاڵی وەک 4700 دۆلار نەبێت؟

ئەم سێ گەنجە دەستیان کرد بە لێکۆڵینەوە لەسەر شێوازی کارکردنی گوێی مرۆڤ، و بۆیان دەرکەوت کە گوێ خۆی بە شێوەیەکی سروشتی دەنگەکان گەورە و بەهێز دەکات. بۆیە دەستبەرداری بیرۆکەی چیپی ئەلیکترۆنی و پاتریە ئاڵۆزەکان بوون، و ئامێرێکیان دیزاین کرد کە هاوشێوەی خودی پێکهاتەی گوێ کار دەکات.

بەم شێوەیە Amanolabs لەدایکبوو؛ ئامێرێکی بیستنی مۆدێرن کە بە تەکنەلۆژیای چاپکردنی سێ ڕەهەندی (3D Printing) بەرهەم دەهێنرێت. ئەم ئامێرە بەپێی شێوەی گوێی کەسەکە دیزاین دەکرێت، تەنها لەڕێگەی وێنەیەک و پشکنینێکی خێرای بیستنەوە. تێچووی دروستکردنی تەنها یەک دۆلارە، لە کاتێکدا بە تەنها 20 دۆلار دەفرۆشرێت، ئەمەش واتە 235 جار هەرزانترە لە تێکڕای نرخی ئامێرەکانی بیستنی پزیشکی لە ئەمریکادا.

ڤیدیۆی ڕاگەیاندنی بەرهەمەکە بە شێوەیەکی بەرفراوان دەنگدانەوەی بەدەستهێنا و ملیۆنان کەس سەیریان کرد، تەنانەت "مستر بیست"یش (MrBeast) یەکێک بوو لەوانەی گرنگی بە پڕۆژەکە دا. لە ئێستادا، ئەم تیمە بە هاوکاری لەگەڵ کۆلێژی پزیشکی زانکۆی هارڤارد کار دەکەن بۆ تاقیکردنەوەی ئامێرەکە لەسەر نەخۆشی ڕاستەقینە. ئەوەی وەک هەوڵێک بۆ یارمەتیدانی باپیری دەستی پێکرد، گۆڕا بۆ داهێنانێک کە لەوانەیە ژیانی ملیۆنان کەس لە جیهاندا بگۆڕێت.

چێژی تەکنەلۆژیا لێرەیە 🥰 سڵاو ڕێزی براتان ئەحمەد بیردۆز 😎💜 / Ahmad Birdoz