مایکرۆسۆفت پێنووسە سوورەکەی هەڵگرت: ماڵاوا OpenAI، بەخێر بێیت داهاتوو! 🚀🔥

سڵاو هاوڕێیانی هێژا و خولیایانی تەکنەلۆژیا! هیوادارم کاتێکی شاد بەسەر ببەن. دەمەوێت باسی ئەو وەرچەرخانە مێژووییە بکەم کە چەند ڕۆژێک لەمەوبەر لە کۆنفرانسی ساڵانەی گەشەپێدەرانی مایکرۆسۆفت (Build 2026) ڕوویدا. مایکرۆسۆفت هێڵێکی سووری بەسەر ناوی OpenAIدا هێنا و هاوکێشەکەی بە تەواوی گۆڕی!

بە کورتی، مایکرۆسۆفت بەردی بناغەی پشتبەستن بە خۆی دانا و سەربەخۆیی خۆی لە هاوپەیمانەکەی دوێنێی ڕاگەیاند. شۆڕشی مۆدێلە نوێیەکان: ڕکابەری بێ بەزەیی 🤖💥 مایکرۆسۆفت یەکەمین و بەهێزترین زنجیرە مۆدێلی ژیری دەستکردی خۆی ڕاگەیاند. لە سەرووی هەمووشیانەوە، یەکەمین مۆدێلی فەرمی خۆی بۆ بیرکردنەوە و لێکدانەوەی قووڵ (Reasoning) بە ناوی mai-thinking-one خستە ڕوو.

ئەمە تەنها نەبوو، بەڵکو ٥ مۆدێلی جۆراوجۆری تریشی لەگەڵدا ڕاگەیاند کە بریتین لە: • مۆدێلی mai image 2.5: بۆ دروستکردنی وێنەی خەیاڵی و ناوازە. • وەشانی فلاش (Flash): سووک و خێرا بۆ کارە دەستبەجێیەکان. • مۆدێلێکی تایبەت بۆ گۆڕینی قسەی دەنگی بۆ دەقی نووسراو (Speech-to-Text). • مۆدێلێک بۆ دروستکردنی دەنگی سروشتی (Voice Generation). • مۆدێلێکی پێشکەوتوو و تایبەت بۆ نووسینی کۆدی پرۆگرامسازی.

ئەم مۆدێلانە هێندە بەهێزن کە مایکرۆسۆفت دەخەنە چەقی ڕکابەریەکی قورسەوە لەگەڵ زلهێزەکانی وەک Google Gemini و Anthropic Claude و بێگومان ڕکابەری هاوپەیمانی دوێنێیان واتە OpenAI دەکەن. سەردەمی بریکارە ژیرەکان: مایکرۆسۆفت دەچێتە ناو شانەی زەردەواڵەکان! 💼🐝

مایکرۆسۆفت بڕیاریدا سەکۆی کراوەی Open Claw بەکاربهێنێت بۆ دروستکردنی بریکارە دیجیتاڵیەکان و زنجیرەیەکی نوێی بە ناوی Autopilots ڕاگەیاند. ئەم بریکارە زیرەکانە بە تایبەت بۆ کەرتی کار و کۆمپانیاکان نەخشێنراون تا فەرمانبەران بتوانن لە کارەکانیاندا بەکاریان بهێنن.

تایبەتمەندی بێوێنەی ئەم بریکارانە ئەوەیە کە بە تەواوی بەستراونەتەوە بە هەموو خزمەتگوزارییەکانی مایکرۆسۆفتەوە:

• لەسەر کۆمپیوتەر (Desktop) و هەور (Cloud) لەگەڵ سەرجەم خزمەتگوزارییەکانی Microsoft 365. • ناواخنی ئیمەیڵ، ڕۆژژمێر (Calendar)، چاتی Teams، بەرنامەی Outlook و OneDrive. • گشتیان بەستراونەتەوە بە خزمەتگوزارییەکانی MCP، و یەکەمین بریکار لەم خێزانە ناوی Scoutە. هاوپەیمانیی نەبەرد لەگەڵ NVIDIA: پڕۆسێسەری RTX Spark ⚡💻

مایکرۆسۆفت لەگەڵ دێوەزمەی پڕۆسێسەرەکانی جیهان واتە NVIDIA، یەکەمین چیپی تایبەت بە لاپتۆپە پێشەنگەکانی ژیریی دەستکردیان بە ناوی RTX Spark ڕاگەیاند. ئەمەش وەرچەرخانێکی گەورەیە چونکە لەسەر تەلارسازیی ARM پەرەی پێدراوە، نەک تەلارسازیی ناسراوی X86ی کۆمپانیاکانی Intel و AMD.

با زۆر بە سادەیی جیاوازییەکەتان بۆ ڕوون بکەمەوە:

• لە تەلارسازیی تەقلیدیی X86: یەکەی چارەسەری ناوەندی (CPU) و یەکەی ڕندەرکردنی وێنە (GPU)، هەر یەکەیان بیرگەی (Memory) جیاواز و سەربەخۆی خۆیان هەیە.

• لە تەلارسازیی نوێی ARM: بیرگەیەکی یەکگرتوو (Unified Memory) هەیە. پڕۆسێسەرەکە خۆی بەپێی جۆری کارەکە بیرگەکە دابەش دەکات. ئەگەر کارەکە گرافیک بێت، زیاتر دەداتە GPU؛ ئەگەر کارەکە پێویستی بە پڕۆسێسینی زانیاریەکانی ژیری دەستکرد بێت، CPU و GPU بە هاوسەنگی لێی دەخۆن.

ئەم تەکنەلۆژیایە وا دەکات ئامێرەکە یەکجار خێرا بێت، توانایەکی بێخەوش پێشکەش بکات و تەمەنی پاتری بە شێوەیەکی خەیاڵی بپارێزێت (ڕێک وەک ئەوەی لە چیپەکانی Apple Silicon M بینیمان).

پڕۆژەی سۆلارا (Project Solara): کۆتایی سەردەمی ویندۆز و ئەپڵیکەیشنەکان! 🌐🔮

ساتیا نادێلا لەسەر ستەیج ڤیدیۆیەکی نیشاندا کە مرۆڤ سەرسام دەکات. کارمەندێک دەچێتە سەر کارەکەی و باجێکی (Badge) پێناسی ئاسایی پێوەیە. بەڵام کاتێک لێی نزیک دەبیتەوە، دەبینیت شاشەیەکی زیرەکە! مایک، بڵندگۆ، کامێرا و هەستەوەری پەنجەمۆری تێدایە. ئەم باجە نەک هەر زانیارییەکان پیشان دەدات، بەڵکو خشتەی کۆبوونەوەکان بیر دەخاتەوە و دەتوانێت هەر قسەیەک لە کۆبوونەوەکاندا بکرێت ڕاستەوخۆ بکاتە دەق، تەنانەت لە ڕێی کامێراکەیەوە زانیاری لەسەر کاڵاکانی ناو کۆگا یان هێڵی بەرهەمهێنان دەدات بە کارمەندەکە.

جگە لەمە، ئامێرێکی تری سەر مێز هەیە وەک کاتژمێرێکی دیجیتاڵی وایە، بە شاشەیەکی لەمس، کامێرا و ناسەرەوەی دەموچاو. کە دەیبەستیتەوە بە شاشەیەکی دەرەکیەوە، دەبێتە ئەزموونێکی تەواوی کۆمپیوتەری دێسکتۆپ بۆ دەستکاریکردنی فایلەکانی کۆمپانیا.

ئەم ئامێرانە یەکەمین بەرهەمی پڕۆژەی Project Solaraن. ئامانجی ئەم پڕۆژەیە دروستکردنی ئامێرگەلێکی زیرەکە کە:

• پێویستیان بە Windows نیە (لەسەر بنەمای ئۆپن سۆرسی ئەندرۆید AOSP کار دەکەن).

• پێویستیان بە ئەپڵیکەیشن و دوگمە و پەنجەرەی تەقلیدی نیە.

• تەنها و تەنها لەسەر بنەمای بریکارە دیجیتاڵیەکان و فەرمانی دەنگی، دەقی و کارلێک لەگەڵ ژینگەی دەوروبەر کار دەکەن.

سەرسوڕهێنەرترین بەش، شێوازی ڕووکاری بەکارهێنەرە کە پێی دەوترێت Just-in-Time UI. واتە ڕووکاری شاشەکە پێشوەختە دیزاین نەکراوە! بەڵکو بریکارە زیرەکەکان لەو چرکەساتەدا و بەپێی قەبارەی شاشەکە (جا باجێکی بچووکی ٤ ئینجی بێت یان شاشەیەکی ١٣ ئینجی) ڕووکاری ناوەڕۆکەکە بە تەواوی دەسازێنن.

گۆڕینی ئاڕاستە بەرەو داهاتوو 🏹🎯 مایکرۆسۆفت بەم هەنگاوانە خۆی بۆ جیهانی داهاتوو ئامادە دەکات. دەیەوێت لە ویندۆز، لە Intel و AMD و تەنانەت لە هاوپەیمانیی OpenAIش تێپەڕێت و یارییەکی گەورەتر بکات.

دوای ئەو کێشانەی لەگەڵ Copilot و لاپتۆپەکانی Snapdragon Elite ڕوویاندا، مایکرۆسۆفت تایبەتمەندیەکانی کۆپایلۆتی لە ویندۆز ١١ کەم کردووەتەوە و ئێستا تەرکیزی ڕەهای خستووەتە سەر بازاڕی کۆمپانیاکان و پیشەگەرەکان. با چاوەڕوان بین و ببینین داهاتووی تەکنەلۆژیا چیمان بۆ دەشارێتەوە!

چێژی تەکنەلۆژیا لێرەیە 🥰 / سڵاو ڕێزی براتان ئەحمەد بیردۆز 😎💜 / Ahmad Birdoz