هواوی یاساکانی کایەکەی گۆڕی؛ کشماتێکی بێدەنگ بۆ تەواوی هەسارەکە! ♟️

پێش ئەوەی بچینە ناو قووڵایی پلانە نوێیەکەی هواوییەوە، با سەرەتا لە لۆژیکی بنەڕەتی پیشەسازی چیپەکان تێبگەین. بۆ چەندین دەیەیە، جیهانی دروستکردنی پڕۆسێسەر تەنها بە یەک هێڵدا دەڕۆیشت: "بچووکتر = بەهێزتر" .

کۆمپانیا زەبەلاحەکانی وەک TSMC، Intel و Samsung ساڵانە تەواوی هێزی خۆیان دەخستە گەڕ بۆ بچووککردنەوەی قەبارەی ترانزستۆرەکان، تا بتوانن ژمارەیەکی زیاتریان لەناو هەمان ڕووبەری چیپەکەدا جێ بکەنەوە. هەرچەندی ژمارەی ترانزیستۆرەکان زیاتر بوایە، پڕۆسێسەرەکە خێراتر، بەهێزتر و ژیرتر دەبوو. ئەم هاوکێشەیە لە مێژوودا بە "یاسای مور" (Moore’s Law) دەناسرایەوە، هەر لەبەر ئەمەش بوو پیشەسازییەکە بەردەوام شانازی بە ژمارەکانی وەک 7nm و 5nm و 3nm ەوە دەکرد.

کاتێک کایەکە دەبێتە کابووس! 😅 بەڵام بە تێپەڕبوونی کات، گەیشتن بە قەبارەی بچووکتر پێویستی بە ئامێری زۆر پێشکەوتوو و خەیاڵی هەیە کە تێچووەکەیان بە ملیارەها دۆلار دەخەمڵێندرێت و تەنها چەند کۆمپانیایەکی کەم لە جیهاندا خاوەنین (کە لە سەروویانەوە TSMCیە).

ڕێک لێرەشدا قەیرانەکەی هواوی دەستی پێکرد؛ سزاکانی ئەمریکا ڕێگەیان گرت لەوەی هواوی بگاتە ئەم ئامێرە مۆدێرنانە، بەمەش لە ڕووی تیۆرییەوە دەبوو بە تەواوی لە پێشبڕکێکە بچێتە دەرەوە.

هواوی نەخشەی شارەکە دەگۆڕێت! 🏙️🛠️ بەڵام لەبری خۆبەدەستەوەدان، هواوی بڕیاری دا یاسای یارییەکە لە بنەڕەتەوە بگۆڕێت.

تەسەوور بکە شارێکی زەبەلاحت هەیە پڕە لە ئۆتۆمبێل و قەرەباڵغی، هەموو کۆمپانیاکان هەوڵ دەدەن ئۆتۆمبێلەکان بچووکتر بکەنەوە تا لە شەقامەکاندا جێیان ببێتەوە و زەحمەتیەکە کەم بێتەوە. بەڵام هواوی سەیری کێشەکەی کرد و گوتی: "ئەی ئەگەر کێشەکە لە قەبارەی ئۆتۆمبێلەکان نەبێت، بەڵکو لە دیزاین و ئەندازیاری خودی شارەکە بێت؟"

ئەمە ڕێک ئەو شتەیە کە لە ناو چیپە نوێیەکاندا جێبەجێی دەکەن: • دابەشکردنی کاتی (Time Scaling): هێزی پڕۆسێسەر تەنها بە ژمارەی ترانزیستۆرەکان نیە، بەڵکو بەو کاتەشەوە بەندە کە سیگناڵە کارەباییەکان بۆ هاتوچۆ لە نێوان بەشە جیاوازەکاندا دەیبەن. هواوی سەرنجی خستووەتە سەر کەمکردنەوەی ماوەی گواستنەوەی سیگناڵەکان لەبری تەنها بچووککردنەوەی قەبارە ڕەقەکە.

• تەلارسازی LogicFolding: تەکنەلۆژیایەکی نوێیە کار دەکات لەسەر ڕێکخستنەوەی خولگە ناوخۆییەکان و نزیککردنەوەی ئەو بەشانەی پێکەوە کار دەکات (ڕێک وەک ئەوەی نەخشەی شارەکە دابڕێژیتەوە تا کات و تێچووی هاتوچۆ کەم بکەیتەوە). بیرۆکەی سەر کاغەز نیە، کاتی کارکردنە! 🚀

مەسەلەکە تەنها پلانێکی تیۆری نیە؛ هواوی ڕایگەیاندووە کە لە ماوەی ٦ ساڵی ڕابردوودا ئەم تەکنەلۆژیایەی لەسەر زیاتر لە ٣٨١ جۆر چیپی جیاواز تاقیکردووەتەوە و هەندێکیشیان ئێستا لە قۆناغی بەرهەمهێنانی بازرگانی و کارپێکردنی ڕاستەقینەدان.

یەکەم پڕۆسێسەری Kirin کە بەم تەلارسازییە دروست کراوە، لەم ساڵەدا (٢٠٢٦) لەگەڵ زنجیرە مۆبایلی نوێی Huawei Mate 90 دەردەکەوێت. هاوکات کۆمپانیاکە چاوی لەوەیە تا ساڵی ٢٠٣١ بگاتە تەکنەلۆژیای ١.٤ نانۆمەتر بەم شێوازە نوێیە. ئەمەش دەری دەخات هواوی دەیەوێت "ڕێڕەوێکی هاوتەریب" بۆ پیشەسازی چیپ دروست بکات کە بە تەواوی سەربەخۆ بێت لە هەژموونی تەکنەلۆژیای ئەمریکا.

کاریگەریی ئەم جووڵەیەش لە بازاڕدا دەرکەوتووە؛ تەنانەت "جێنسن هوانگ"ی بەڕێوەبەری کۆمپانیای ئینڤیدیا (NVIDIA) دانی بەوەدا نا کە بازاڕی چیپی چین ئێستا "بۆ هواوی جێهێڵدراوە". دیارە لۆژیکی نوێی چین زۆر ڕوونە: "ئەگەر نەتوانین بە یاسا کۆنەکان بیبەینەوە، یاسای نوێ دەنووسینەوە!"

چێژی تەکنەلۆژیا لێرەیە / سڵاو ڕێزی براتان ئەحمەد بیردۆز 😎💜 / Ahmad Birdoz