🚨 تەمەنم ٤٠ ساڵە و ٣٠٠ هەزار دۆلار قەرزارم! ژیان لە کۆریای باشوور بە تەنها ١٠ دۆلار لە ڕۆژێکدا.

ئەمە تەنها ناونیشانی ڤیدیۆیەکی یوتیوب نیە، بەڵکو واقیعی تاڵی ژیانی پیاوێکی ٤٠ ساڵەی کۆرییە بە ناوی "کانگ گوانگ-سیک". کانگ دوای ئەوەی ستارتەپەکەی لە بواری گواستنەوەی کارەباییدا مایەپووچ بوو، خۆی لەبەردەم شاخێک لە قەرزدا بینیەوە.

لۆژیکـی سەرکێشی و تامی تاڵی شکست: کانگ باس لەوە دەکات کە لە ساڵی ٢٠٢٠دا، کاتێک شەپۆلی ئۆتۆمبێل و گواستنەوەی کارەبایی جیهانی داگیرکردبوو، ئەویش هەموو شتێکی خۆی خستە سەر ئەم پڕۆژەیە. بەڵام کێشەی دابینکردنی سەرمایە وایکرد کۆمپانیاکەی بڕووخێت. هەرچەندە کۆمپانیاکە بە یاسایی مایەپووچ بوونی تەواو بوو، بەڵام قەرزە کەسیەکانی ئەو وەک سێبەر دوای کەوتوون.

بۆچی ئەم چیرۆکە گرنگە؟ 📍 کولتووری شکست: لە وڵاتێکی وەک کۆریای باشووردا، شکست تەنها لەدەستدانی پارە نیە، بەڵکو "شەرمەزاریەکی" گەورەیە. کۆمەڵگە وەک "دۆڕاو" (Loser) سەیری ئەو کەسانە دەکات کە لە کێبڕکێیەکاندا دەشکێن. کانگ دەڵێت: "هەستم بە تەنیایی و بێ ئومێدیەکی کوشتندە دەکرد."

📍 مانەوە بە ١٠ دۆلار: ئێستا ئەم پیاوە ڕۆژانە تەنها ١٠ دۆلار خەرج دەکات. ئەو خواردنە سادانە دەخوات کە خۆی ئامادەیان دەکات؛ سووپی گۆشتی هەرزان، سەوزەوات و برنج. ئەو ئەم ژیانە سادەیەی خۆی لە سۆشیاڵ میدیا بڵاودەکاتەوە بۆ ئەوەی پەیامێک بگەیەنێت.

📍 پەیامی سەرەکی: کانگ دەڵێت: "خەڵک حەز دەکەن ببینن کە مانەوە و بەردەوامبوون مەرج نیە هەمیشە خەمناک بێت، دەکرێت هێشتا گەرموگوڕی تێدا بێت." ئەو دەیەوێت بیسەلمێنێت کە مرۆڤ دوای شکستی گەورەش دەتوانێت متمانە بەخۆبوونی بەدەست بهێنێتەوە.

وانەیەک بۆ ئێمە: ژیانی هەموومان ڕەنگە تووشی شتانـێکی نەخوازراو ببێت، بەڵام گرنگ ئەوەیە چۆن مامەڵە لەگەڵ ئەو دۆخە نوێیەدا دەکەیت. کانگ لە جیاتی ئەوەی خۆی بشارێتەوە، چیرۆکی خۆی کردە ناوەڕۆکێک کە هەزاران کەس هانی دەدەن و هاوسۆزی بۆ دەردەبڕن. لۆژیکـی ژیان ئەوەمان پێ دەڵێت: شکست کۆتایی ڕێگەکە نیە، بەڵکو تەنها وەرچەرخانێکی قورسە.

👇 ڕای ئێوە چیە؟ ئەگەر لە دۆخێکی وەک ئەودا بوویت، ئایا دەتوانیت بەو شێوەیە ڕاشکاو بیت و چیرۆکی شکستەکەت بگێڕیتەوە؟

ئەحمەد بیردۆز نووسەر و شیکەرەوەی تەکنەلۆژی

Ahmad Birdoz