کۆمپانیای CATLـی چینی پەردەی لەسەر پاتریەکی نوێ بۆ ئۆتۆمبێلی کارەبایی لادا کە لەوانەیە تێڕوانینی باو بۆ تەمەنی پاترییەکان بگۆڕێت، بەتایبەتی لەگەڵ بارگاویکردنەوەی خێرادا.

بەپێی وتەی کۆمپانیاکە، پاتریە نوێیەکەی (5C) دەتوانێت بۆ ماوەی چەندین ساڵی درێژ بەرگەی بەکارهێنانی سەخت بگرێت بەبێ تێکچوونێکی بەرچاو، ئەمەش هەواڵێکی گرنگە بەتایبەتی بۆ کڕیارانی ئۆتۆمبێلی کارەبایی بەکارهاتوو کە ترسیان لە مێژووی بارگاویکردنەوەی خێرای ئۆتۆمبێلەکە هەیە.

کۆمپانیای CATL جەخت لەوە دەکاتەوە کە پاتریەکە ٨٠٪ی توانای خۆی دەپارێزێت دوای ٣,٠٠٠ سووڕی بارگاویکردنەوەی تەواو لە پلەی گەرمی نموونەیی ٢٠ پلەی سەدیدا، کە هاوتایە لەگەڵ نزیکەی ١٫١ ملیۆن میل (١٫٨ ملیۆن کیلۆمەتر).

تەنانەت لە بارودۆخە سەختەکانیشدا ئەنجامە سەرنجڕاکێشەکان بەردەوامن، بۆ نموونە، لە پلەی گەرمی ٦٠ پلەی سەدیدا، کە هاوشێوەی کەشوهەوای هاوینی کەنداوە، پاترییەکە ٨٠٪ی توانای خۆی دەپارێزێت دوای ١,٤٠٠ سووڕی بارگاویکردنەوە، واتە نزیکەی ٥٢٠ هەزار میل (٨٤٠ هەزار کیلۆمەتر)، کەئەمەش تەمەنی کارکردنە و لەوە زیاترە کە زۆربەی ئۆتۆمبێلەکان دەیبڕن.

ئەم ئەنجامانە پشت بە کیمیایەکی پێشکەوتوو و بەڕێوەبردنی گەرمی زیرەک دەبەستن کە ئەو داخورانە کەم دەکاتەوە کە بەهۆی بارگاویکردنەوەی زۆر خێراوە دروست دەبێت، کە ڕێگە دەدات پاتریەکە لە ماوەی نزیکەی ١٢ خولەکدا بارگاوی بکرێتەوە. سەرەڕای ئەوەی کە ژمارەکان هێشتا تیۆرین، بەڵام بەدیهاتنی بەشێکیشیان لەوانەیە وا بکات پاتری ئۆتۆمبێلە کارەبایەکە تەمەنی لە خودی ئۆتۆمبێلەکە درێژتر بێت.

#AhmadBirdoz #BirdozTech #ژیان-لەگەڵ-تەکنەلۆژیا