ماڵئاوا شاشە.. داهاتوو چاوەکانمان ئازاد دەکات! 🌌👀

هاتنی گووگڵ بۆ ناو بازاڕی ئامێرە بێ شاشەکان (Screenless Devices)، فرسەتێکی نایابە بۆ ئەوەی ڕاستییەکی گرنگ باس بکەین. نێوانمان بمێنێتەوە، من پێم وایە شۆڕشی ڕاستەقینە لێرەوە دەست پێدەکات.

هەموو جۆرە شاشەیەک بە هەر قەبارە و شێوازێکەوە بێت، تەنانەت کاتژمێرە زیرەکەکانیش، ڕۆژێک دێت دەمرن.

بۆچی هێندە دڵنیام کە شاشەکان بەرەو نەمان دەچن؟ وەڵامەکە سادەیە: چونکە داهاتوو دەیەوێت چاوەکانت ئازاد بکات.

لێرەدا چەند هۆکارێکی سەرەکی دەخەمە ڕوو کە بۆچی چیتر پێویستمان بەو تەختە شووشە ڕووناکانە نابێت:

١. سەرنجی تەواو بۆ جیهانی ڕاستەقینە تەکنەلۆژیای داهاتوو دەیەوێت تۆ لە کات و شوێندا ئامادەییت هەبێت و تێکەڵی ژیانی دەوروبەرت بیت، نەک سەر کز بکەیت بۆ ناو مۆبایلەکەت.

بۆ نموونە، ئەگەر مامۆستای زانکۆ بیت و لە ناوەڕاستی پێشکەشکردنی وانەیەکی گرنگدا بیت، حەز ناکەیت نۆتیفیکەیشنێکی مۆبایلەکەت سەرنجت تێکبدات. تەنها لەرینەوەیەکی (Vibration) هێمن لەسەر دەستت بەسە بۆ ئەوەی پێت بڵێت کاتی دەرمانەکەت هاتووە، بێ ئەوەی یەک چرکە لە دنیای ڕاستەقینە داببڕێیت. ئەمە ڕێک فەلسەفەی پشت ئامێری وەک Whoop یان Fitbitـە نوێیەکەی گووگڵە. ٢. ڕووکاری دەنگی (Voice UI) جێگەی وێنە دەگرێتەوە چیتر مەرج نیە چاوەکانت سەرقاڵ بن بۆ ئەوەی سوود لە داتاکان وەربگریت. ئێستا کایەکە گۆڕاوە بۆ ڕووکاری دەنگی. کاتێک هێدفۆنێکی وەک AirPods یان هەر جۆرێکی ترت لەگوێدایە، تەنها بە دەنگ فرمان دەدەیت و یاریدەدەرە زیرەکەکە جێبەجێی دەکات.

• بەڵگەی حاشاهەڵنەگر: سەکۆی کۆدێکس (Codex) کۆمەڵێک ئامرازی نوێی بۆ گەشەپێدەران دابین کردووە کە دروستکردنی ئەپە دەنگیەکان زۆر ئاسان دەکات.

• پێشکەوتنی خێرای دۆخی دەنگی (Voice Mode) لە ChatGPT و Gemini ڕێگەت پێدەدات شاشەی مۆبایلەکەت بە تەواوی بکوژێنیتەوە و وەک مرۆڤێک گفتوگۆیان لەگەڵ بکەیت. لە داهاتوودا شاشەی کاتژمێر و باندەکان دەبنە ڕووبەرێکی زۆر بچووکی LED یان OLED تەنها بۆ نیشاندانی شتی زۆر سەرەتایی.

٣. کامێرا لە ناو هێدفۆن و ناسنامەی زیندەیی پێم دەڵێیت: "باشە ئەگەر شاشە نەبێت، چۆن شت ببینم یان ئامێرەکە چۆن دەمناسێتەوە؟"

• ئێستا کار لەسەر ئەوە دەکرێت کامێرای بچووک بخرێتە ناو هێدفۆنە بێوایەرەکان؛ تۆ پرسیار دەکەیت و ئەو لە ڕێگەی ئەو کامێرایەوە کە دیمەنەکەی بەردەمت دەبینێت، وەڵامت دەداتەوە.

• بۆ ناسینەوەی تۆش، ئامێرەکە پشت بە نیشانە زیندەییەکانی جەستەت (Biometrics) دەبەستێت؛ وەک لێدانی دڵ، پەستانی خوێن و تایبەتمەندییەکانی پێستت. جۆرێک لە "پەنجەمۆری زیندەیی" تایبەت بە خۆت دروست دەکات تا دڵنیا بێتەوە کە ئەوە تۆیت ئامێرەکەت بەستووە.

٤. تەکنەلۆژیای دەوروبەر (Ambient Technology) کاتێک بە تەواوی پێ دەنێینە ناو سەردەمی چاویلکەکانی واقیعی زیادکراو (AR)، هاوێنەکان تەواو ڕوون دەبن و جیهانی ڕاستەقینە دەبینیت، بەڵام زانیارییە دیجیتاڵییەکان لە لایەکی هاوێنەکەوە بە هێمنی دیار دەبن بێ ئەوەی چاوت سەرقاڵ بکەن. ئەم جۆرە سیستەمە پێی دەوترێت "تەکنەلۆژیای دەوروبەر"؛ واتە لە چواردەورتدایە و کار دەکات بەبێ ئەوەی پێویستی بەوە بێت تەواوی سەرنج و وزەی تۆ داگیر بکات. بە کورت و کوردی هاوڕێم؛ داهاتوو بە تەواوی بێ شاشەیە!

چێژی تەکنەلۆژیا لێرەیە 🥰 سڵاو ڕێزی براتان ئەحمەد بیردۆز 😎💜 / Ahmad Birdoz