🎮 دزینی ٦١٠ هەزار هەژماری Roblox؛ چیرۆکی ئەو گەنجانەی ٢٢٥ هەزار دۆلاریان کۆکردەوە!

گروپێک لە گەنجانی ئۆکرانی کە تەمەنیان لە نێوان ١٩ بۆ ٢٢ ساڵیدایە، توانیویانە یەکێک لە گەورەترین هێرشە سۆفتوێریەکان بکەنە سەر یاریزانانی Roblox و پاشان ئەو هەژمارانە لە بازاڕە ڕەشەکاندا بفرۆشنەوە.

💡 هاکەکە چۆن ئەنجامدرا؟ (لۆژیکـی هێرشەکە) سەرۆکی گروپەکە کە تەمەنی تەنها ١٩ ساڵە، لە ڕێگەی مەکۆکانی (Forums) تایبەت بە یاریەکانەوە دوو هاوکاری تری دۆزیوەتەوە. ئەوان بەرنامەیەکی "تێکدەر"یان (Malware) دروست کردووە و لەژێر ناوی "ئامرازێک بۆ باشترکردنی یاریەکە" یان "وەشانـی پڕۆفیشناڵ بۆ خێراکردنی یاریکردن" بڵاویان کردووەتەوە.

هەر کە یاریزانەکە بەرنامەکەی داگرتووە، بەرنامەکە دەستبەجێ زانیاریەکانی چوونەژوورەوەی (Login Data) بۆ هاکەرەکان ناردووە.

💰 بازرگانی بە هەژمارەکانەوە: دوای ئەوەی توانیویانە زانیاری زۆرتر لە ٦١٠ هەزار هەژمار بەدەست بهێنن، بەم شێوەیە کاریان کردووە:

پۆلێنکردن: هەژمارەکانیان بەپێی دەگمەنی (Rarity) ئەو کاڵایانەی تێیدایە و بڕی دراوی Robux پۆلێن کردووە.

هەژمارە دەگمەنەکان: توانیویانە ٣٥٧ هەژماری "Elite" بدۆزنەوە کە نرخیان یەکجار بەرز بووە.

فرۆشتن: ئەم هەژمارانەیان لە ماڵپەڕە ڕووسیەکان و گروپە داخراوەکانی یاریزانان فرۆشتووەتەوە و کۆی گشتی ٢٢٥ هەزار دۆلار قازانجیان کردووە.

👮‍♂️ کاتی دەستگیرکردن: پۆلیسی ئۆکرانیا لە شاری لڤیڤ هێرشی کردە سەر ١٠ شوێنی جیاواز کە سەر بەم گروپە بوون. ئەوەی دۆزرایەوە بڕێکی زۆر ئامرازی تەکنیکی بوو: ٣٥ هەزار دۆلار پارەی نەختینە. ٣٧ مۆبایل، ١١ کۆمپیوتەری دێسکتۆپ، ٧ لاپتۆپ و چەندین تابلێت.

⚖️ سزا لە چاوەڕوانیاندایە: ئەم گەنجانە ئێستا ڕووبەڕووی چەندین تۆمەتی وەک "دزی" و "چوونەژوورەوەی نایاسایی بۆ ناو سیستەمەکان" دەبنەوە. بەپێی یاساکانی ئۆکرانیا، ئەگەری هەیە تا ١٥ ساڵ زیندانی بکرێن.

ئەمە وانەیەکی گرنگە بۆ هەموو یاریزانان؛ هەرگیز هیچ بەرنامەیەک یان وەشانـێکی دەستکاریکراو بۆ باشترکردنی یارییەکان لە دەرەوەی سەرچاوە فەرمیەکان دامەگرن، چونکە ڕەنگە تەنها یەک کلیک دوور بیت لە لەدەستدانی هەموو شتێک. ئایا تۆ تا ئێستا تووشی هاککردنی هەژماری یارییەکانت بوویت؟ 🧐

براتان ئەحمەد بیردۆز 💜

Ahmad Birdoz