هەواڵێکی سەیر: نەمرکردنی مرۆڤ لە ناو کۆمپیوتەردا! 🧠💻

توێژەرێکی پێشووی زانکۆی MIT دکتۆراکەی جێهێشتووە بۆ ئەوەی خەونێکی "خەیاڵی زانستی" بکاتە ڕاستی: هەڵگرتنی مێشکی مرۆڤ (Mind Uploading) لەسەر کۆمپیوتەر. پلانی پڕۆژەکە وایە لە ماوەی ١٠ ساڵی داهاتوودا، بە بەکارهێنانی ٥٠ هەزار گرافیک کارتی NVIDIA H100، مێشکی مرۆڤ بە تەواوی کۆپی بکرێتە ناو جیهانی دیجیتاڵ.

ئایا ئامادەیت وەک "سۆفتوێر" تا هەتایە بژیت؟

درێژەی هەیە: ئیساک فێریمان (Isaak Freeman)، ئەو گەنجە بلیمەتەی کە دکتۆرای لە یەکێک لە بەناوبانگترین زانکۆکانی جیهان (MIT) جێهێشت، ئەو دەیەوێت جیاوازی نێوان "بایۆلۆژیا" و "تەکنەلۆژیا" نەهێڵێت.

چەمکی Mind Uploading چیە؟ ئەم پڕۆژەیە پشت بە زانستێک دەبەستێت بەناوی Connectomics. بیرۆکەکە ئەوەیە کە مێشکی ئێمە تەنها بریتیە لە ملیارەها پەیوەندیی دەماریی. ئەگەر بتوانین نەخشەی تەواوی ئەم پەیوەندییانە بکێشین و کۆدی بکەین، دەتوانین "هۆشیاری" مرۆڤەکە بگوازینەوە بۆ ناو سێرڤەرێکی بەهێز.

پلانی کارکردن و ژمارەکان: فێریمان و تیمەکەی کارەکانیان بەم شێوەیە دابەش کردووە:

• سەرەتا لە بچووکەوە: زاناکان پێشتر توانیویانە مێشکی جۆرە کرمێک (کە تەنها ٣٠٢ دەمارەخانەی هەیە) بە تەواوی هاوشێوەسازی (Simulation) بکەن.

• ئاستەنگی گەورە: مێشکی مرۆڤ ٨٦ ملیار دەمارەخانەی تێدایە. بۆ کۆپیکردنی ئەم قەبارە مەزنە، پێویستیان بە هێزێکی لەرادەبەدەری پرۆسێس کردن هەیە.

• سوپەر کۆمپیوتەر: پڕۆژەکە پێویستی بە ٥٠,٠٠٠ گرافیک کارتی NVIDIA H100 هەیە. تێچووی سەرەتایی ئەم کارە بە نزیکەی ١٠ ملیار دۆلار دەخەمڵێندرێت.

ئایا کێشەکە پارەیە؟ نەخێر! فێریمان دەڵێت تێچووی نەخشەسازیی دەمارەخانەکان بە خێراییەکی سەیر دابەزیوە. کێشەی ئێستا "تەکنەلۆژیای وێنەگرتنە"؛ واتە چۆن بتوانین بە وردییەکی ئەوەندە بەرز وێنەی مێشک بگرین کە هیچ پەیوەندیەکی دەماری و بیرەوەریەک ون نەبێت.

ئەنجامە مەترسیدار و سەرنجڕاکێشەکان: ئەگەر ئەم پڕۆژەیە لە ١٠ ساڵی داهاتوودا سەرکەوتوو بێت: ١. مردنی بیرەوەی مێشک دەبێتە بژاردە: جەستەت دەمرێت، بەڵام بیرکردنەوە و کەسایەتیت لە ناو جیهانێکی دیجیتاڵیدا بەردەوام دەبن.

٢. گەشەی بێسنوور: وەک سۆفتوێرێک، دەتوانیت زانیاریەکان بە خێرایەکی سەیر دابەزێنیتە ناو مێشکت و هەمیشە لە نوێبوونەوەدا بیت.

پرسیارە جەوهەریەکە: تەکنەلۆژیا لەوانەیە بتوانێت مێشکت کۆپی بکات، بەڵام ئایا ئەو "کۆپیە" هەر خۆتی؟ یان تەنها ڕووەکەیە و "ڕۆح" و "هەستەکان" لەوێدا بوونیان نابێت؟

ئەگەر بەیانی پێت بڵێن دەتوانین هەموو بیرەوەری و هۆشیاریت بەبێ کەم و کوڕی بگوازینەوە ناو کۆمپیوتەر، ئامادەیت جەستەت جێبهێڵیت و ببیتە سۆفتوێر؟ یان پێت وایە مرۆڤ تەنها بە جەستە و گۆشت و خوێنەوە مانای هەیە؟

Ahmad Birdoz | پسپۆڕ و شیکەرەوەی تەکنەلۆژیا تایبەتمەند لە شیکردنەوەی ستراتیژیی کۆمپانیا تەکنەلۆژییەکان و جیهانی Ai.