هیندستان یەکەمین ڕێگای سووری دروست کرد🛣️📍

⚡ کورتە

• ڕێگای سوور چییە؟: مەبەست لەدروست کردنی ڕێگاکە ترساندنی شۆفێر نیە، بەڵکو ناچارکردنیەتی خێراییەکەی کەم بکاتەوە بۆ پاراستنی ئاژەڵە کێوییەکان.

• فێڵە ئەندازیارییەکە: بەکارهێنانی چینێکی سووری ٥ ملیمی لە ماددەی (Thermoplastic) کە هەم ڕەنگەکەی ئاگادارت دەکاتەوە و هەم لەرەلەرێکی کەم دروست دەکات، (Tactile feedback) بێ ئەوەی وەک "تەقە تەقە"ی جاران بێزارکەر بێت.

• تەکنەلۆژیا + ژینگە: تەنها ڕەنگ نیە؛ ٢٥ تونێلی ژێرزەوی بۆ ئاژەڵەکان و پەرژینی تایبەت دانراوە تا ئاژەڵەکان ڕێنمایی بکرێن بۆ شوێنی پەڕینەوەی سەلامەت.

• ئەنجام: زانست دەڵێت پەرژین و تونێل پێکەوە ڕێژەی مردنی ئاژەڵەکان بە ڕێژەی ٨٣٪ کەم دەکەنەوە.

💎 "ڕێگای سوور"؛ کاتێک ئەندازیاری دەبێتە پارێزەری سروشت

لێرەیەم بۆ ئەوەی باس لە پڕۆژەیەکی جیاواز بکەم کە تێیدا تەکنەلۆژیا لە خزمەت سروشتدایە. هیندستان لەسەر شاڕێگای NH 45 پڕۆژەیەکی تاقیکاری ئەنجامداوە کە پێی دەڵێن "Table top red marking". ئەمە تەنها ڕەنگێکی جوان نیە، بەڵکو سیستمێکی دەروونی و فیزیاییە بۆ کۆنترۆڵکردنی خێرایی.

بۆچی ڕەنگی سوور و چینی بەرزکراوە؟ ئەندازیارانی NHAI چینێکی ٥ ملیمییان لە ماددەی گەرمی پلاستیکی بەکارهێناوە. کاتێک ئۆتۆمبێلەکە دەچێتە سەر ئەم بەشە، شۆفێرەکە هەست بە لەرەلەرێکی کەم و دەنگێکی جیاواز دەکات. ئەمە وای لێ دەکات "بەبێ ئەوەی بە خۆی بزانێت" پێی لەسەر بێنزینەکە هەڵبگرێت. ئەمە پێی دەوترێت (Design instead of enforcement)، واتە دیزاینەکە ناچارت دەکات یاسا جێبەجێ بکەیت نەک پۆلیس و کامێرا.

بەڵام جەماعەت، ڕەنگ بە تەنها بەس نیە! ئەگەر ئاژەڵەکە ڕێگەی هەبێت بێتە سەر قیڕەکە، هەر دەبێتە قوربانی.

بۆیە لێرەدا ٢٥ "Animal Underpasses" (تونێلی ژێرزەوی) دروست کراوە. پەرژینی بەهێز لە هەردوو لای ڕێگاکە دانراوە کە وەک "ڕێبەر" کار دەکەن؛ ئاژەڵەکە ناتوانێت بێتە سەر ڕێگاکە و ناچار دەبێت بەدوای ڕێگەیەکدا بگەڕێت، تا دەگاتە تونێلەکان و بە سەلامەتی دەپەڕێتەوە.

ئەم مۆدێلە تەنها لە هیندستان نیە؛ چیلیش خەریکە بە وەبەرهێنانی نزیکەی ٦٠٠ ملیۆن دۆلار پڕۆژەیەکی هاوشێوە لە دوورگەی چیلۆێ جێبەجێ دەکات. گرنگترین خاڵ لێرەدا "بەردەوامی" پەرژینەکانە؛ زانست دەڵێت ئەگەر پەرژینەکە کورت بێت یان کون بێت، کارەساتەکە هەر ڕوودەدات. وەک "وەستا"یەک لە بواری تەکنەلۆژیا، دەڵێم ئەمە هەنگاوێکی نایابە. هیوادارم ڕۆژێک بێت لە ڕێگاکانی خۆشمان (وەک ڕێگای دەربەندیخان یان ناوچە شاخاوییەکان) ئەم جۆرە ئەندازیارییە ببینین.

نەک تەنها تابلۆیەکی ژەنگاوی کە لەسەری نووسراوە "ئاگاداری ئاژەڵ بن"!

ئێوە چۆنی دەبینن؟ ئایا ئەم "ڕێگا سوورە" لە کوردستان کار دەکات یان شۆفێرەکانی ئێمە سوور و سپی لایان یەکە😁 👇

چاوەڕێی کارێکی نوێ و شێوازێکی جیاواز بن: هەوڵی من ئەوەیە ئەو بابەت و هەواڵانە بەشێوەیەکی ڕێکخراو بەئێوەی بگەیەنم. هەروەها ببێتە پاڵپشتیەک بۆ کارەکانم و بەرەو پێشبردنی. بەپشتیوانی خوای گەورە.. پاشان پاڵپشتی ئێوەی خۆشەویست.

ئەحمەد بیردۆز نووسەر و شیکەرەوەی تەکنەلۆژی

Ahmad Birdoz

#Ahmad_Birdoz #Birdoz_Tech #CivilEngineering #WildlifeProtection #IndiaTech #SafetyFirst #Innovation #RoadDesign