ڕووە تاریکەکەی داهاتووی بێ شاشە؛ کاتێک چاویلکەیەک دەبێتە سیخوڕی سەر شەقامەکان! 🕶️

باسی داهاتووی ئامێرە بێ شاشەکانمان کرد، بەڵام با سەیری ڕووە مەترسیدار و تاریکەکەشی بکەین کە ئێستا لە ئەمریکا و ئەوروپا بووەتە کێشەیەکی جیدی.

خانمێکی ئەمریکی لەسەر شەقامێک دەڕوات، پیاوێک دێتە پێشەوە و دەیەوێت گفتوگۆی لەگەڵ بکات. خانمەکە هەست بە نائارامی دەکات و ڕێگەی خۆی دەگرێتە بەر. پیاوەکە واز ناهێنێت و بەدوایدا دەڕوات؛ خانمەکە بۆ چەواشەکردنی، چەندین کۆڵان و شەقام دەگۆڕێت تا دواجار وا هەست دەکات لێی ڕزگار بووە.

دوای دوو ڕۆژ، هاوڕێکانی ڤیدیۆیەکی بۆ دەنێرن و دەڵێن: "سەیری ئەم کارەساتە بکە!". کاتێک سەیری دەکات، دەبینێت پیاوەکە هەموو سات و جووڵەیەکی ئەو ڕۆژەی بەدوایەوە بووە، بە ڤیدیۆ گرتووە و لە تۆڕە کۆمەڵایەتیەکان بڵاوی کردووەتەوە.

چۆن وێنەی گرتووە بێ ئەوەی مۆبایلی پێبێت؟ شۆکەکە لێرەدایە؛ خانمەکە دەڵێت ئەو پیاوە نە مۆبایلی بەدەستەوە بووە و نە هیچ کامێرایەک، تەنها چاویلکەیەکی ئاسایی لەچاو کردبوو!

بەڵێ، چاویلکەی زیرەکی کامێرادار کە لە چاوی کردووە و بە هێمنی هەموو شتێکی تۆمار کردووە.

ئەم ڕووداوە تەنها یەکجار نیە؛ لەم چەند مانگەی دواییدا دەیان چیرۆکی هاوشێوە لە ئەمریکا، بەریتانیا و ئەوروپا تۆمار کراون. کارەساتەکە ئەوەیە پۆلیس دەڵێت دەستەوەستانە و ناتوانێت هیچ ڕێکارێک بەرامبەر ئەم سەرپێچیکارانە بگرێتە بەر، چونکە لە یاسای ئەو وڵاتانەدا، وێنەگرتن لە شوێنە گشتیەکاندا قەدەغە نیە. کاردانەوەی تۆڕە کۆمەڵایەتیەکان تاکە خاڵی باش ئەوە بوو کە پلاتفۆرمەکانی وەک تیکتۆک، یوتیوب و فەیسبووک بەپەلە هاتنە سەر هێڵ، ڤیدیۆکانیان سڕییەوە و ئەکاونتی ئەو کەسانەشیان بە تەواوی داخست کە ئەم جۆرە وێنەگرتنە بەکار دەهێنن بۆ هەراسانکردنی خەڵک.

ئێمە لە ناو شەپۆلێکی نوێ و مەترسیداری پێشێلکردنی تایبەتمەندێتی (Privacy) داین لە ڕێگەی کامێرا گۆڕاو و شاراوەکانەوە. خوای گەورە خۆی سەرئەنجامەکەی بەخێر بکات و بمانپارێزێت.

چێژی تەکنەلۆژیا لێرەیە 🥰 / سڵاو ڕێزی براتان ئەحمەد بیردۆز 😎💜 / Ahmad Birdoz